،
عيد هاليوم عيد وحط كفك بكفي
لازم نجدد اللي راح قبل المراحي
..
أنت من خلقت الأيام يا زين شفي
وأنت برقن بخفاقي من سنين لاحي
..
ارحبي يالظروف وهدي شويش خفي
كافي اللي لفانا منك مبطي وراحي
..
حان وقت السعاده قربي لي وضفي
لملمي هالشتات ورجعيلي جناحي
..
ودي اكفخ بجنحان المحبه وارفي
لين أوقف على ذاك الغلا والضواحي
..
ديرتن من قساوة برد اهلها يدفي
واحدن في طرفها ضم طيب وسماحي
..
أنت مقصود بالي فيك ما اقدر اخفي
أحمر الدمع خدي بلها واستباحي
..
لعنبوها محبه كل ما قلت عفي
قالت العين تكفى خاطري ما استراحي
..
دامني ما لقيته وحط كفه بكفي
ما تفيد الكرامه والمحبه وشاحي
..
المناوي خذتني والليالي تلفي
والهقاوي كبيره فالمجيء والمراحي
..
بس أنا ما ثنيت الرجل دونه مقفي
حالف إني لأضحي قبل عيد الأضاحي
..
لو هديتك حياتي ما اتوقع تكفي
كيف مجنون ليلى يصبح اليوم صاحي
..
أنت رمز الموده والوفا وين أوفي
لك دروبن عظيمه من جميع النواحي
..
بس أنا لك نوايا صادقه واستشفي
مركب الحب صامل رغم هب الرياحي
..
وأنتي الحب الأول آه يا كل شفي
ليت الأعياد دايم في لقاكم تباحي
